simple farmer

dey mus hol he but dem muss’n kill he
wuh happen now?
yuh ain been to de dance de odda nite?
yuh know i doan deh pon dem tings
well wuh he name stab up a bai in deh
who stab who?
meh baby father, but dey muss’n kill he. ah waan dey hol’ he fuh a year or suh den let he out. me daughter gah fuh geh mine
but he is a mad man
no he ain mad, he does play mad. he uses to be mad when lil malaria fly up in he head but he arite now. dat gone long now
sound like a mad man to me
yea but leh me tell you som’ting. dem mad man kno how fuh hit de spot and he chile support money heavy
spot?
yea hit de spot
oh
[long pause & refection time]
so de man he stab dead
nah he ain dead but he might’n mek it cause when he de stabbin he he de rippin an stabbin
an you tink this man should be free?
yes! i waan me chile support money